السلام عليكم ....اخى العزيز ليك حق تسئل وليك حق تعرف اجابه سؤالك..بس اعتقد ان كلنا بنسال نفس السؤال..بس انت متاكد انك مش مالنوع اللى نفسه يسيب البلد ويسافر زى ناس!!!!!!!!!! عموما انا شايفه ان السبب فعلا فى اللى احنا فيه هو اهل البلد كل واحد مش عاوز يبدا بنفسه كلهم مستنيين غيرهم يغيروا البلد طب واحنا فين كل واحد يبدا بنفسه واكيد البلد هتتغير.. ومش كل حد يتخرج ويلاقى نفسه اعد عالقهوه يفكر يهرب ويسافر مش ده الحل.رغم ان الحياه صعبه جدا وناس كتير مش قادره تعيش بس يبقى عندنا امل فى ربنا وفى نفسنا شويه وربنا يسهل للجميع ان شاء الله...اشكرك ياعمرو عالفرصه دى ان الواحد يطلع اللى جواه..بس يارب مش اكون طولت عليكوا...واحب اعرف رايك فى موضوع السفر ده؟؟؟؟؟؟

شكرا جدا يا همسه على المشاركه وشكرا لدينا على المشاركه وأهلا بيكى فى المنتدى واضح انك عضوه جديده

بالنسبه لدينا وعلامة التعجب اللى على السفر دى انا مقولتش انى مش عايز أسافر انا من الناس اللى فعلا عايزه تسيب البلد ودى أسئله فى دماغى ودماغ كل شاب ومش شايف سبب للتعجب ده على انى متأكد انى مش من الناس اللى عايزه تسيب البلد لاء انا عايز أسيبها النهارده قبل بكرا . مش هروب انا مش بعرف أهرب بس لان انا مش لاقى مكان فيها بقينا غرب فى بلدنا وبنتعامل زى الغرب مش زى الغرب ده الاجانب واخدين حقهم فيها أكتر مننا وأظن فى أماكن كتير فى مصر بنتعامل فيها على أننا أغراب ومش اهل البلد ومثال بسيط جربى كده تروحى شرم الشيخ
وأنا استحمل الغربه بره بلدى بس مستحملهاش وانا فى بلدى الغربه اه بتوجع وصعبه بس واضح انه بقى وجع لابد منه فى ظل الظروف اللى بقينا فيها دى
وبعدين يا دينا هو انتى يعنى شايفانا عارفين نسيبها البلد مش مخليانا عارفين نعيش فيها وكمان مش مديانا فرصه حتى نمشى منها انا بتهيألى لو فتحوا الحدود من بكرا الصبح هتلاقى البلد دى بقت فاضيه
انا مش بقول أن السفر بره حلو ولا حاجه أحنا بره فى دول الخليج بنتعامل معامله زى الزفت وكلنا عارفين الكلام ده مع العلم ان أى حد من الدول دى لما بينزل مصر بيتعامل معامله كويسه جدا وده ليه؟
لان أصلا المصرى بيتهان فى بلده يبقى مش هيتهان بره بلده.بلدنا بقى المصرى عندها ملهوش قيمه يا دينا
انا مقصدش بكلامى أعمم فى مصريين بره ربنا كرمهم وبيتعاملوا أحسن معامله بس الغالبيه العظمى من المصريين فى الخارج بيتهانوا وكتير من أصحابى بره بيتعامل المعامله دى وبيكلمونى وبيبكوا على اللى بيحصلهم بس عارفه أخر كلام بيقولوه ايه " الاهانه بره مصر أحسن فى كل الحالات أحسن من مصر أهو هنصبر وفى الاخر هنلاقى نتيجه صبرنا وتعبنا أما فى مصر بنتعب ومش بنلاقى "
انا نفسى أفضل فى بلدى ومش حابب أنى اسيبها بس البلد هى اللى مش عايزانا واضح كده انها مش عايزانا لا نخرج منها ولا نعيش فيها بقينا عاملين زى اللى بيحتضر لا هو ميت ولا هو عايش

انا بتمنى من ربنا انى الاقى فرصه تخلينى أغير تفكيرى بس زى ما انتى قولتى كده كله واحد مستنى غيره يغير ومحدش عايز يعمل حاجه واللى بيقول لاء بيترمى ورا الشمس وانتى عارفه ورا الشمس دى عندنا يبقى فين

لازم فعلا زى ما انتى قولتى كل واحد يغير من نفسه بس واحد بيغير من نفسه فى وسط ملايين
مستنين صلاح الدين تانى صعب اوى يعيش فى وسطهم لانه هيروح ورا الشمس

شكرا على المشاركه الحلوه دى وأسف على الاطاله بس موضوع السفر ده الكلام فيه مش بيخلص . وواضح من كلامك انك تعرفينى كويس ياريت أعرف مين حضرتك
شكرا يا همسه على المشاركه وشكرا جدا يا دينا على المشاركه والموضوع مفتوح لان الاسئله اللى فيه تمس ملامحنا وأحلامنا